【破冰復合】苗禮德解凍史卓豐！提供鎮倉寶攻婦女銀袋賽
蘋果日報 2019/10/30 06:00
黃志祥苗禮德史卓豐星洲司令
「馬圈冇永遠敵人」呢句金句再一次得到引證，練馬師苗禮德喺上季初，主動同史卓豐「分手」，兩人停止合作接近一年後，嚟緊星期日（11月3日）沙田日賽，這個組合終於破冰，再次走在一起。
苗禮德鎮倉寶、高達116分的信和老闆黃志祥家族愛駒「星洲司令」，將會重配史卓豐，出戰星期日1800米草地三級賽婦女銀袋賽，「星洲司令」在港只曾喺史卓豐同貝湯美胯下贏馬，豐豐騎過6次得1冠3亞1殿1第五名，未甩過獎金，無疑係最佳拍檔。
苗禮德之前將史卓豐放入雪櫃，正是源於上季初豐豐策「星洲司令」出戰馬會一哩錦標得梗頸四，賽後苗禮德面口麻麻，並即場大聲向史卓豐問責。
幾日後即去年11月21日，史卓豐又搏失苗廐「龍騰摘星」3.9倍屈居亞軍，自此兩人便再無交收。
不過事過境遷，史卓豐始終對「星洲司令」十分熟悉，故苗禮德亦願意再給他機會。
「星洲司令」上季用其他騎師贏唔到馬，但三度喺級際賽上名，包括一級賽冠軍一哩賽得亞軍，遠征新加坡克蘭芝一哩錦賽亦跑第三。
此駒經常硬撼馬王「美麗傳承」，冇頭馬見面可理解，但計級數今仗跑婦女銀袋賽三級賽只負120磅，肯定有優勢。
「星洲司令」今季經過一場熱身後，周日回配最合拍嘅豐豐，如果交出表現，苗禮德未來肯定還有其他馬交給豐豐搏殺，所以豐豐一定打醒十二分精神，鬥志毋庸置疑。