【新增內容】
現年36歲嘅韓國女星孫藝珍，孖29歲男星丁海寅合作嘅JTBC新劇《經常請吃飯的漂亮姐姐》，將於後日首播，兩位主演今日下午就現身製作發佈會谷劇。

孫藝珍穿上白色連身裙現身，展現高貴氣質，丁海寅就穿上黑色西裝，二人以「黑白配」造型出席發佈會。心情非常好嘅孫藝珍於會上跟丁海寅不時甜笑對望，二人合照時又十指緊扣，非常sweet，令人期待二人於劇中嘅姊弟戀演出。

孫藝珍於會上坦言因為年紀比丁海寅大，好擔心外表望起嚟比對方老，另外又大讚丁海寅靚仔，每次見到對方都令佢心情非常好。丁海寅都大讚孫藝珍好靚，首次見面時佢更唔敢注視對方，不過依家二人似乎已經好熟，丁海寅更係不時望實呢位「漂亮姐姐」。

導演又表示：「所有電視劇都必須將現實狀況戲劇化，劇中兩人真係好似情侶。」孫藝珍就問丁海寅：「難道你依家鍾意我？」丁海寅就回答：「我每一個瞬間都感到心動。」大冧孫藝珍，同時炒熱現場氣氛。

另外，孫藝珍跟蘇志燮主演嘅韓片《現在很想見你》，至今已突破200萬入場人次，同時打破最賣座愛情電影《初戀築跡101》紀錄，比《初戀築跡101》更早突破200萬人次。

更多韓流，喺晒《娛果》
http://fb.com/appledailyent