上次盛品儒「疑似」為咗避開王維基、臨時缺席商台活動，理由係「開緊會」。今次缺席項明生書展宣傳活動，理由係:「我0依家喺內地，有少少問題，星期日先返到落嚟。」

但原來今次活動，係盛品儒主動同項明生提出、想嚟支持佢。點知通告都出晒喇，盛生又甩底。話唔關死敵王維基事，好難令人信服。

項明生受訪時時，盛品儒知道佢出咗書，於是主動聯絡佢，話想嚟支持。因為項明生已邀請了王維基，於是覺得有點為難:「我同佢(盛品儒)講，可能有少少問題，於是我講俾佢知請咗邊個嚟，佢當時都話冇問題。其實我都擔心兩人同場有乜嘢效果，但盛生話冇問題，咁我都要同王生(王維基)講聲，佢都話冇問題，仲好大方，話握手都可以。點知前晚盛生同我講，佢0依家喺內地，有少少問題，要星期日先至返到嚟，仲不停saysorry。」

記者提議不如由項明生出馬，請盛品儒大方一點，項明生就話:「君子一言，駟馬難追。」意指既已發了通告話會到，但臨時又缺席。問項明生是否暗示盛生唔係「君子」？項明生話:「我冇話佢唔係君子。」咁係咪覺得佢有欠大方？項明生就話:「呢個係佢嘅想法，可能佢諗完一輪，決定都係唔嚟喇。王生就大方啲，可能始終因為佢係老闆。」