張靜初日前接受訪問，係專訪入面劈頭話寧缺唔濫，仲話自己依家感情空白，遇唔到合適對象，又話對感情嘅事有潔癖云云，點知，唔夠幾日就被踢爆奉子成婚。

神通廣大嘅網民好眼利，一眼認出喺北京市東城區民政局婚姻登記處，排緊隊登記嘅張靜初，相入面張靜初紮住馬尾，戴住黑超嘅係張靜初，身邊有個戴Cap帽戴到好低，驚死有人到認佢嘅馬尾男，馬尾男Rock味好重，仲要留埋鬚根，man到爆。

有內地媒體第一時間有記者打畀張靜初經理人胡佳求證，問到張靜初有冇去登記結婚？經理人聽完即刻口窒窒話：「啊啊啊，你從哪裡看到的消息？」嗱！呢個就係俾人踢爆第一個反應，經理人回魂之後，就反問喺邊度收到風，當佢知道張相係網友影，仲已經放咗上網，即刻收線，之後經理人嘅電話梗係打極唔通，玩潛水喇！

而除咗傳張靜初登記註冊結婚外，仲有傳佢係奉子成婚。不過內地消息亦指張靜初噚日已出發赴柬埔寨拍戲，民政局照片好可能係早前拍嘅，係舊照一張。

噚日張靜初朝早就喺微博放咗張新戲海報，著住白色露肩長裙嘅佢，開心Share咗個「愛」字，仲留言話「comingsoon……」，依家咁睇，佢真係唔止宣傳《脫軌時代》套戲咁簡單，而佢真係想同大家分享愛！

不過張靜初工作室今早發聲明，否認張靜初奉子成婚報道，聲明內容如下：「對於昨晚開始，網絡流傳的「張靜初奉子成婚」的假新聞，作為經紀公司，我們不多做回應。目前，張靜初小姐正在國外拍戲，很好。感謝網友及媒體朋友的關心，我們將追究圖片來源。特此聲明﹗----張靜初工作室
」