剛剛宣佈月底做新娘嫁畀「Figure王」EricSo嘅王菀之(Ivana),最近幫一套動畫配音《小王子》配音,而張敬軒就負責幫小王子配音。其實之前Ivana已經喺另一套動畫《玩轉腦朋友》入面嘅「阿愁」配過音,今次喺《小王子》裏面就幫戲入面充滿童真、好想追尋小王子嘅小女孩配音,Ivana話:「因為我本人都非常有童真,所以聲演小女孩冇難度。」講到呢套經典小王子故事,佢話一直都有睇所以更加容易幫佢代入角色喎。
而聲演主角小王子嘅張敬軒,就話自己第一次接觸小王子嘅故事書嗰時,仲讀緊中學,之後喺巴黎一間二手書店特別搜羅咗一本1963年發行嘅小王子書,就做咗粉絲,所以今次聲演絕對冇難度,佢話:「我覺得用呢個故事去鼓勵所有小朋友甚至大朋友一齊保有童真,係好有使命感。」
講開《小王子》呢本法國故事書,確實瘋魔唔少大人同細佬,呢本小書面世超過70年,佢入面小王子插圖更加係畫龍點睛。而呢套有2D同3D版嘅動畫《小王子》,會喺今年平安夜上映。