【答中冇獎】網民呼籲當紅藝人發聲 徐天佑反問：有邊個當紅？
蘋果日報 2019/10/29 11:26
當紅徐天佑發聲
眾藝人當中，徐天佑算是在逆權運動中勇於表態，他昨晚又在Instagram貼出一番肺腑之言：「小朋友唔好喊，辛苦你了。記者們銀髮們，辛苦你了。女士們學生們，辛苦你了。大家辛苦了。」天佑一出post，即有網民留言：「性別歧視？男士呢？」天佑秒回：「男士係戰士，仲使講咩！」
不過也有網民說：「如果當紅的能幫忙發聲就好，點解你唔叫你啲朋友發聲？」網民似乎不了解娛樂圈遊戲規則，藝人一旦高調表態會失去內地巿場，所以大部份藝人都少談政治。有另一網民即留言：「第一，天佑已經係一個當紅的藝人。第二，多啲人發聲當然好，但唔係每個人都有天佑嘅赤子之心。」要求當紅藝人出來發聲的網民再說：「佢當紅就唔探討啦，相比好多人知名度爭好遠，因為呢個世界真係睇知名度，我都欣賞天佑的，只係如果而家一線嘅出嚟講，唔係能夠能令民意更加凝聚？」天佑忍不住反問：「有邊個當紅？」網民再說：「你自己諗吓，你自己識邊個知名度高，我只係想鼓勵更多人幫忙，呢個時候唔係計較面子。」天佑再回覆：「我乜嘢面子都冇諗過，我只係真係好奇想知你覺得邊個當紅？」其實留言當中，大部份是感謝天佑的發聲。