連環拳係少林拳初學者嘅一個套路，總共20式，體現少林拳法動作中眼、手、身、法、步特點，成套拳唔算複雜，但結構緊密動作美觀，打得順暢好好睇。一般嚟講，上一堂一定學識，但要學得精，就要上四堂左右，並多加練習。

大嶼山少林武術中心舊址係大澳公立學校，遠離迪士尼、昂坪360呢亭無Mood人造遊客旺區，感覺幾隱世。我同一眾模特兒晨早嚟到，發覺建築物雖然稱唔上宏偉壯觀，但正中有個約3個籃球場大嘅草地練武場，盡頭仲豎咗塊寫住「少林」兩字的牌匾，加埋周圍嘅幾間宿舍、飯堂、平房，清幽環境令人心境平靜，講嘢都自不然細聲啲。
兩位一身白袍嘅光頭師傅出場，心情隨即興奮，當日有學生參加武術班，只見師傅做每個動作都帶勁有力，同學仔就好似BB學行路咁，跟啲唔跟啲，場面超趣怪，但個個都表現得好盡力，應該同我一樣經過一輪自我催眠：「我跟少林師傅學武功，我勁，我勁，我好勁……」其實單睇師傅耍拳已經係種視覺享受，普通一記踢腿，竟可踢出一個弧形，線條優美到不得了，要學，就學呢啲，咪學成龍大哥。經過兩粒鐘熱身同學耍連環拳後，大家都身水身汗，不過值得嘅，少林中心行政總監譚淑玲仲話：「11月將會正式推出武術訓練營，仲多時間畀大家體驗少林簡樸生活。」好呀，到時我一定攞假參加。

永欣係中心大師傅，自幼拜少林寺釋行書大師學少林拳法、器械、氣功，兼修佛法、禪學同少林醫學，1985年任河南省「少林拳太極拳專習院」少林系主任及總教練，翌年於「96全國武林精英邀請賽」中獲「武林名師」榮譽。《龍虎門》主角石黑龍同奸角金羅漢都練金鐘罩，問佢點睇呢本漫畫，佢答：「唔睇！」漫畫話練到十二關會刀槍不入喎，點睇？「金鐘罩係外練功夫，多練可以強壯身體，增加激打（耐打）能力，但刀槍不入就唔得，除非表演啦。」

高潤祺：「幾好玩呀，不過拳法好複雜，應付唔嚟。我會再參加，當減肥囉！」

張肇良：「好曬呀，好難呀，最難做連環拳後尾幾個動作，不過會練多啲嘅。」

李裕彤：「有啲動作唔記得咗，唔知打拳會唔會高啲，我中三㗎喇，比較矮。」

陳志杰：「練武身體好嘛，但我又無師傅咁叻，返屋企會再練，不過記得先。」

香港少林武術文化中心（29858898）
地址：大嶼山大澳石仔埗街（洪聖古廟側）
交通：東涌機鐵站乘11號巴士、梅窩乘1號巴士、昂坪乘21號巴士直達大澳巴士總站
網址：www.shaolincc.hk

日期及時間：周一至日10:00am-4:00pm
收費：周一至五成人$180，小童$100；周六、日及公眾假期成人$200，小童$120，包學習武術、參觀中心、午膳、導賞、證書
備註：父母可帶同最多2名子女參加，年齡不限。

日期：10至12月周一至日10:00am-4:00pm
收費：周一至五$120，包專車接送往返東涌至大澳$150；周六、日及公眾假期$150，包專車接送往返東涌至大澳$180，各包武術訓練、午膳、觀光大澳、證書
備註：帶隊老師費用全免，中心可代安排55座位旅遊巴士於指定地點接送，車費另議。