第八場三班1650米，「新妙星」今季遲至十月尾才復出，短短三周內跑三場，狀態一直在提升，今次是最弗一次，朝早試跑明顯「行」番，縱使近績普通，也想博這回會跑得比上次好，有二檔兼有高手之助，相對較有分頭，會博佢先。
「紅簿仔」近兩場只近而無威脅，正好反映無分在手，排檔稍差便蝕唔起，睇方仔早前安排一課三駒拍跳，出王牌報今場，將已交代過的「贏到爆」轉報泥地，反映好有決心，如今抽埋蘇銘倫排到三檔，定會珍惜。「獅鷲」相比前兩駒其實略次，上仗靠賺超慢步速入Q，根本唔叻，今場有「至尊飛星」可能會攪亂檔，形勢可能不一樣。
「華美之寶」上仗與「獅鷲」同場，一齊賺慢步都只跑第三，睇法與前無變，仍覺唔叻要等進步，這仗不同的是，預期會有較正常步速，覺得其均速性能，或許會較慢步速更啱發揮。「天長地久」當弗，但升班、轉場及大幅縮程，疑問唔少。「招財快駒」韁口未完全改善，初跑谷草排12檔，也不易應付。
「威武福星」轉由賀賢接手，養到肥肥白白，要先跑一場。「酒至尊」未及水準。「神聖火炬」跑姿論盡，谷草上山落坡，覺得唔啱佢。「肯利多」多做點工夫，體重急跌。「軍功」力短難贏，谷草也最叻跑第三。「至尊飛星」欠一哩長力。