呢輪約親啲friend放工食飯，一係就話約咗男朋友；一係就話要返屋企睇電視，睇狐妮喎。今時今日，其實唔使返屋企都可以隨時隨地睇電視喎。
前排去開數碼港參觀佢哋嘅數碼娛樂培育中心，其中一間中小企ADigit研發一個新科技產品gogomediaPro，只要裝喺屋企接駁埋電視，就可以利用手提電腦或者係PDA手機等，透過上網連接gogomediaPro可以隨時隨地睇同儲存電視節目，即使喺外國都睇到本地電視台，以後出trip唔使驚。
產品另一特色可透過內置嘅TVTuner自身調頻，唔會影響屋企人睇緊嘅節目，家人睇緊TVB，我可以轉台睇亞視，甚至收費電視。
ADigit產品經理甄智豪同我講，10月會推出新版本，消費者同一時間可收看四個電視節目，「一個用嚟錄影；一個做viewcam；其餘兩個睇電視節目。」部機賣3,280蚊，可以接受喇，不過電話上網就幾「襟」計。
逢周一至周四刊出