衛詩雅出名鍾意打機，試過喺社交網招攬隊友一齊打機，又試過向網友求救：「如何打機不被母親發現？」引嚟網民熱烈討論。最近詩雅同「打機達人」達哥一齊拍廣告，詩雅當然唔會放過機會搵達哥教路，達哥就同詩雅分享咗打機心得同推介新遊戲。

廣告其中一part，詩雅幫達哥洗頭，佢特別炮製咗個波波頭，達哥笑話：「好開心有專人幫我洗頭！」詩雅乘機約埋達哥一齊打機，膽粗粗問：「可唔可以carry我呀？」達哥個頭喺詩雅手上，惟有笑住回應：「梗係可以啦！」

今次詩雅扮法官，以超長髮示人，問到寧願揀光頭定係「barcode頭」男朋友?詩雅話：「我揀光頭男朋友，因為barcode頭喺街上行太引人注意，我驚人哋望佢多過望我，不過揀男朋友最緊要係心地好。」佢仲話最驚變barcode頭：「假如有日起身發現自己變咗『barcode頭』，我會即刻落超級市場，將個頭拍落barcode機睇吓嘟唔嘟到，我好想睇吓我值幾錢！」

講到長頭髮保養方法，詩雅話：「因為工作成日要set頭，所以我好重視頭髮保養，會用強力風筒，亦會用天然產品整嘅偏方搽頭，唔使用工一定唔會夾頭髮同吹頭，而且一定會用髮尾油。」

精選娛聞，喺晒《娛果》
http://fb.com/appledailyent