事實上高盛呢間美資大行,雖然唔似某啲歐資行積極參與細價股買賣,但亦非無可能發生,呃晒全港報章並唔出奇。根據高盛所講,有關南海股份,是為一獨立第三者購入以製作財務產品,並非高盛或旗下管理基金的投資。簡單嚟講,有客仔要求投資銀行代發輪、期權或CB,都有可能達到以上要買貨嘅條件。
翻查呢幾日南海成交量,日日都係三甲,周四更位列榜首,成交額達到10億銀,假若「有心人」想趁機散貨,絕對可以成功達到目的。今次公關公司煞有介事出新聞稿,一方面由於涉及股份不足5%,不足以達到披露水平,另一方面,由於新聞稿唔同出通告,未經港交所(388)的存檔備份,所以無法追究其是否披露虛假資料,甚至連是誰出主意發新聞稿,亦不易追查。事件亦反映咗一個問題,究竟成日見有歐資大行買賣逾5%的股票,點分係代客揸貨或發衍生工具,抑或係真正持倉?