陳柏宇（Jason）同老婆符曉薇今日以夫妻檔喺尖沙嘴出席派對，活動中，兩公婆不時手拖手，當Jason唱歌時，要求老婆一齊唱，事後符曉薇投訴：「成日叫我唱歌，你知我五音不全，你想我出醜。」Jason即刻解釋：「我唔係想你出醜，我想畀人知道我哋可以做到帶歡樂畀大家嘅角色啫！」

訪問時，佢哋向傳媒互相投訴，大耍花槍，Jason指老婆夾硬為囡囡Abigail着樽領衫，搞到個女喊，「我好嬲，佢為咗一己私慾，令到個女咁辛苦，但係佢嬲我嬲佢，最後我要o氹番佢。」符曉薇不甘示弱，投訴有次想跟老公出街，反被老公黑面對待，Jason表示：「有次同佢出街，佢遲咗5分鐘，令到我之後嘅工作推遲咗，其實佢鬧我嘅次數可以做個專訪。」

講到如果有客戶搵佢哋一家三口工作，Jason表示唔會抗拒。問到佢哋係咪想三年抱兩？符曉薇話：「我都OK，之前想生3個㖭，但生完第一個好攰，要好大體力，反而佢當初唔想生，佢驚分薄對囡囡嘅愛。」

精選娛聞，喺晒《娛果》
http://fb.com/appledailyent