今年，發展商不斷將前兩年賣貴咗嘅樓盤減番到市價賣，搞到之前買咗走唔切嘅買家差唔多個個都變晒蟹。呢兩日就有網友kkkaa34567喺Uwantsforum度，以純粹討論形式搞咗個「最多蟹的樓盤」選舉，雖然暫時只得39位網友投票，但就有22位揀咗荃灣爵悅庭為最多蟹嘅樓盤，第二位係大角嘴嘅一號銀海。
網友whowants105更以「荃灣，爵悅庭（六星級蟹宅）」嚟形容呢個盤。有投票嘅kennyx就話：「……我choose咗一號銀海……佢哋先大件事……harbourgreen（君滙港）減價3成（前排），比銀海啲前賣價平咁多…佢哋死梗。」

一號銀海變火海

mch411網友更絕，話個盤叫「一號火海」喎，而cf168就簡單直接點出買新盤嘅風險「新盤=炒or借margin……」。
今次選舉嘅候選樓盤仲有將軍澳君傲灣、長沙灣碧海藍天、上水御皇庭，同埋西灣河嘉亨灣等。
睇番土地註冊處資料，自從新鴻基地產今年5月高調劈完爵悅庭之後，之前買貴咗嘅業主都要蝕走，所以二手成交嘅差唔多全部都蝕，個別蝕差不多三成。
至於一號銀海雖未入伙，但都有兩宗蝕讓，蝕幅一至兩成。呢個盤信和舊年底以高市價八、九成賣咗成600個單位，雖則未入伙仲可以拖，但大家都睇未來一年樓價最多都係打橫行，加上新地今次低調劈大角嘴君滙港，照咁嚟睇，已買咗嘅應該全部蟹晒，所以市場都謔稱呢個盤叫「一號銀主」盤。另外，蟹得好緊要嘅盤，當然仲有葵涌雍雅軒、將軍澳都會駅同君滙港啦。