由名導蘇菲亞哥普拉（Sofia Coppola）執導、影后妮歌潔曼（Nicole Kidman）、姬絲汀登絲（Kirsten Dunst）同艾麗芬寧（Elle Fanning）主演嘅《美麗有毒》（The Beguiled）題材非常大膽，講一個士兵唔覺意闖入咗間女校，令全部女人都愛上佢，更為此勾心鬥角。呢部戲唔單止全女班上陣，仲為蘇菲亞哥普拉帶來康城影展最佳導演獎，成為史上第2個女導演獲得此獎項。妮歌潔曼於戲中飾演個惡女人，皮笑肉不笑非常恐怖，而戲外佢接受訪問，就坦言指自己想借呢部戲為行業內嘅女性發聲，尤其係導演一職，更需要多啲女性加入。

《美麗有毒》係套非一般嘅驚慄片，佢將1971年奇連伊士活（Clint Eastwood）主演嘅《獨行俠勇闖美人關》重拍，不過敘事角度由男性轉為女性，因此由女導演執導就變得非常關鍵。「呢套戲應該係由女性執導，我覺得如果男人做導演，個方向就會完全唔同，而呢部作品嘅質感就好豐富而且非常女性化。」佢更表示，而家業內得4%嘅導演係女性，好多人都以為時代進步有所改善，但其實唔係，仲講到嬲嬲地，估唔到戲裡戲外嘅妮歌一樣硬朗。