《我是歌手》第三季噚晚正式開播，對7位歌手表現，網民各有評價。早前網傳第一集係胡彥斌唱《山丘》攞第七名，點知播出先知，最終觀眾票選結果係韓紅攞得第一，唱《心動》嘅新加坡歌手陳潔儀包尾，古巨基排第六。對於陳潔儀墊底，唔少網民為陳潔儀抱不平。

韓紅、孫楠一向喺內地歌壇「飆高音」之人，喺《我是歌手3》初賽當日，韓紅喺網民票選攞第一，有人覺得係實至名歸，亦有人批評未諗過陳潔儀會喺觀眾票選中包尾。其實陳潔儀喺參加節目嗰陣，佢曾表示：「自己並不屬於競技類型的歌手。」陳潔儀初賽出場後，表現確實同其他歌手嘅風格唔同，以抒情慢歌出戰。

有網民幫陳潔儀解釋：「有的歌手不需要大嗓門、不需要飆高音、不需要秀轉音、不需要灑狗血、不需要啜泣裝感情，因為她有聲音的氣質。」不過，《我是歌手》系列一向以「嗌」同「飆高音」等唱功，先可以令歌手突圍而出，相信呢個評分標準，唔「嗌」唔高分!好似上一季，阿G.E.M.(鄧紫棋)都喺編曲上，準備咗好多位俾佢「飆高音」，明顯係要咁唱，先可以穩守前幾名。

首唱公佈結果後，陳潔儀最終「包尾」，佢表情都有啲尷尬。網民嘲笑留言：「看來都喜歡大嗓門啊!」不過陳潔儀就喺歌手互評階段獲得第三名，歌手都覺得佢唱得唔錯，尤其係韓紅更盛讚陳潔儀嘅歌聲。