亞視熄機超過一年，德勤日前亦獲法庭解除作為亞視臨時清盤人，有「金牌清盤王」之稱嘅黎嘉恩（Derek，圖）終於可以唞一唞，噚日見傳媒時都鬆一口氣話功成身退，而佢亦唔聲唔聲換咗個新title㖭喎。
Derek其實都幾多「朵」，除咗金牌清盤王、企業醫生，仲有一個好巴閉嘅「德勤南天王」稱號，事關佢原本嘅職銜係「德勤中國華南區主管合夥人」，佢又咁出名，大家於是幫佢起個花名叫做南天王。

當年入職人工低過文員

不過，噚日佢現身就用上「德勤中國事務所副主席」呢個新職銜。聽講，佢𠵱家一人戴住兩頂帽先，中國華南區主管合夥人就快有人頂上，稍後公司就有正式宣佈，到時Derek只係擔任副主席。
睇番Derek之前一篇訪問，佢提到廿幾年前由關黃陳方會計師樓，跳槽到德勤，當年佢只要求5,000蚊人工，入職後發現德勤一般會計文員都有6,000蚊。好在佢冇就咁發難唔撈，廿幾年後做到副主席，年薪應該加多幾個零喇。
而佢手上亦處理過唔少經典案件，好似擔任「小甜甜」龔如心同歌手梅艷芳嘅遺產臨時管理人、數碼電台（DBC）接管人等等，喺財金界可謂無人不識。有時人生嘅路就係咁，最初看似蝕晒底，走到最後，得益嘅可能係自己。

李華華
mailto:[email protected]