日本25年最強颱風「飛燕」登陸四國德島，多地落暴雨，截至今早逾700班航班取消。原來徐天佑跟太太身在京都，今日天佑喺社交網貼暴雨短片，留言：「台風21号 #osaka #kyoto #呢度好大風 #仲要趕住返香港做嘢㖭！」

《蘋果》聯絡天佑了解，佢以短訊回覆：「上星期因私人事到達京都，初到埗時天氣不算很壞，但看新聞知道有個好強的颱風迫近，直至今早非常大風，在屋內都聽到外面很大風聲，沒想到情況這樣嚴重，街道上的物件被吹倒，又有樹倒塌，甚至天台都吹到有灰剝落，惡劣的天氣都持續了數小時，現在機場也因為水浸而關閉了，今天所有航班都停航，暫時未知何時會重開，所以滯留當地，本身明天安排了在香港工作，無奈現在這個情況要缺席。希望身處日本的人都安全，希望個颱風少啲損毁傷亡！」天佑表示在京都入住日式平房，因今日天氣太惡劣，全日沒有外出，佢原定搭傍晚機返港，o依家滯留日本未知歸期。

陸詩韻亦身處大阪，佢今午喺facebook貼咗冒風撐傘外出照片，佢留言：「第一次身處於報道指25年來最強颱風，的確…很強…怕怕！最強颱風 #日本颱風。」佢張相真係吹到頭髮凌亂，連樣都睇唔到。陸詩韻回覆《蘋果》，佢話：「OK呀，已留在室內地方。」

此外，車淑梅同老公張文新、兒子、新抱同7個月大孫女三代同堂，噚晚先至喺大阪關西國際機場返香港，對於超強颱風吹襲日本，搞到關西機場跑道同停機坪等設施慘遭洪水淹沒，車淑梅今日回覆《蘋果》時話:「我哋噚晚返到香港，真係好好彩，如果返遲一日，湊住個BB都唔知點算。但我日前喺黑門市場撞見幾個香港人，佢哋話玩多幾日先至返香港，都擔心佢哋唔知點。我哋噚日喺嗰邊冇落雨，天氣仲正正常常，估唔到今日會咁，希望大家平平安安啦！」

精選娛聞，喺晒《娛果》
http://fb.com/appledailyent