估唔到講英國電視牌照費,會引來咁多讀者電郵。除咗博士Y之外,重有幾位前英國公民,留英學生,以至德國居民寫嚟。
一位德國讀者Ling話:「我以前住喺英國,現居於德國,無論英德,我哋都要交電視牌照費,我認為兩地人民非常老實,百分之九十九都會繳交,唔會因此而呃政府。交電視牌照費嘅好處就係我哋可以睇電視而唔使睇廣告,睇厭咗CNN嘅吹牛,可以立即轉台,聽番另類意見。呢度人人都交牌照費,邊度會招惹到當局派人上門查視咁低莊。你有冇留意到,香港地鐵要入閘,柏林嘅U-Bahn(地鐵)係冇閘嘅,乘客自出自入,車內有人查票,但我從來冇見過有人搭霸王車!」