噚晚嘅「亞洲流行音樂節」，意都有唔少意外發生，好似巫啟賢咁，差少少就跌咗落個窿度。而喺韓國嚟代表BIGBANG嘅勝利，喺出場嘅時候，蝦碌跣腳，差啲仆低。勝利事後通過翻譯笑言：「嗰吓係甫士，係我計算在內。其實唔知點答，當時心入面諗大件事，唔知點算。」之後喺表演嘅時候，又好似巫啟賢咁邊唱邊退後行，差啲好似巫啟賢咁出事，好在有驚無險。

勝利喺上半年單飛搵食，下半年會歸隊BIGBANG。勝利之前拍咗部韓劇將會喺秋季播出，佢話之前練過一輪演技，唔會有太大負擔，好享受同其他演員合作。至於有冇問吓有豐富拍劇經驗嘅成員Top，勝利話：「計拍劇佢係我前輩，佢叫我唔好咁緊張。」勝利話會學多啲廣東話應付嚟香港時，可以同香港粉絲表達自己心意，佢噚晚仲用廣東話講：「頭痛。」

BIGBANG將會有同門師進軍樂壇，勝利以前輩身份指導後輩話，希望新人演出時唔使驚，跳舞同表現亦要比前輩好，希望大家鍾意韓國藝人。