韓國年度盛事《MBC演藝大賞》噚晚喺首爾舉行，由主持人全炫茂、天團BIGBANG成員勝利及女團Girl's Day成員惠利擔任主持人。

而噚晚《MBC演藝大賞》最高榮譽大獎就由《全知干預視角》嘅李英子奪得，佢之前已經喺《KBS演藝大賞》上奪得大獎，今次再下一城喺《MBC演藝大賞》奪大獎，可謂雙喜臨門。李英子奪大獎後感動得眼濕濕，就連台下嘅朴娜萊都開心到爆喊。

李英子獲獎後就話得獎功勞係全體工作人員，又話：「今天去訂餐廳時，原以為只有30、40人，冇諗到足足有成70人咁多，節目係需要好多人一齊努力製作出來。」

另外，唔少男團女團成員都有出演綜藝節目，好似人氣男團Wanna One成員姜丹尼爾就憑《被子外面很危險》奪得真人騷部門男子新人獎，佢得獎後喺台上感觸話呢個獎應該係佢今年作為Wanna One成員嘅最後一個獎。而女團MAMAMOO成員華莎則憑《我獨自生活》奪得真人騷部門女子新人獎，之前佢曾揚言得獎會進行性感公約，噚晚佢亦喺現場大擺性感甫士。

部份得獎名單：
大獎：李英子
年度綜藝節目獎：《我獨自生活》
最佳CP: 聖光、小松
真人騷部門新人獎: 姜丹尼爾、華莎
新人獎：梁耀燮

精選韓流，喺晒《娛果》
http://fb.com/appledailyent