師兄劉浩龍今日嚟到《蘋果》娛樂直播節目《今日ENT》，同大家宣傳吓即將喺四月再次舉行個人演唱會：「對上一次開演唱會已經係三年前，再對上一次賣飛嘅演唱會就已經係2012年嘅事。」

講開2012年喺藝術中心舉行嗰兩場賣飛演唱會，師兄話：「我記得買飛前夕好緊張，雖然會場座位唔多得四、五百人，但都令我夠晒緊張，好彩公司打嚟同我講話啲飛一分鐘已經賣晒，就令我放心可以集中全力去準備演唱會，我希望今次都可以好快賣晒，唔使一分鐘啦十分鐘賣晒都好呀，我保證會盡全力演出。」

師兄話為咗今次演唱會，會出盡全力健身操肌肉兼排舞，因為希望到時可以跳Part舞俾大家睇，佢話：「我每次跳舞啲朋友都係笑我，不過唔緊要都係帶娛樂俾大家啫，今次我好想認真咁去練習，跳一次俾大家睇，如果到時都真係笑我嘅，咁起碼都娛樂到你哋呀。」

講起跳舞，師兄仲特登帶咗件紀念品嚟同我哋分享，就係一件紅白色嘅外套：「呢件外套係我第一次開個人音樂會嘅時候着嘅，當時我就着住呢件衫，入邊係冇着衫嘅仲要襯條白色褲，同我兩個好朋友藍奕邦、周國賢一齊着住呢件衫，跳咗一Part《小虎隊》嘅舞，依家呢件衫我唔肯定自己仲着唔着得落，我覺得應該可以嘅，但我唔會喺呢度試啦。」

咁會唔會到時再着返套衫俾大家睇？師兄話：「我未知呀，但應承大家就算我開騷唔着，都會事前着住呢件衫影相擺上ig畀大家睇，當然入面係一定唔會着衫啦。」至於會唔會騷肌肉，師兄就話睇吓大家反應再決定喎。

傾完一輪計，師兄就同觀眾抽卡玩估歌仔， 分別預備咗四首師兄嘅歌曲同一首神秘歌曲俾師兄估，淨係用做動作畀觀眾估歌名，分別係《滄海遺珠》、《記得》、《不一定》同《思覺失調》，最後嘅彩蛋就係女友容祖兒嘅《麻煩你》，睇下師兄抽中祖兒首歌會係咩反應？

咁今次演唱會會唔會邀請女友做嘉賓？師兄話：「今次唔會啦，雖然Rundown仲未度好，但我哋開會一致決定唔會請嘉賓，由我自己一個人搞晒，大家都知道我有好多朋友，但今次真係想我自己一個做晒，所以唔會有嘉賓環節。」仲話不單止女友，連佢好朋友藍奕邦同周國賢都唔會做嘉賓：「佢哋可以做貴賓，一齊嚟睇我個騷， 演唱會門票2月7號就會公開發售，希望大家多多支持。」