英超車路士財雄勢大，年年都會洗一大筆錢去買人。但唔知係咪嫌本土球員性價比低，車仔近年都好少買佢地，直至今年先嚟左個飲水哥。而睇返英國《太陽報》嘅數據就仲誇張，三年來只有一個英人幫車仔入過波，而佢更加係已經離隊嘅中場羅夫度斯卓克，本地網民畀咗個更親切嘅譯名佢：龍虎切。

《太陽報》由2014/15賽季開始計，並以聯賽嘅BIG SIX作比較。最重用英人嘅就係熱刺，嗰班人三年嚟已經入咗120球，而排第二嘅就係剛剛比人大炒嘅利物浦，佢地嘅英人夾埋入左68球。最少嘅就問都唔使問，當然係富豪球會曼城同車路士。曼城都叫做好啲，叫做有29球，點都好過車仔嘅一球。

車仔嗰一球就要追溯到2016年4月作對維拉嘅賽事，龍虎切為球隊先開紀錄，最後仲大戰主隊4:0。其實車仔嘅心態唔難理解，因英人嘅波底普遍唔夠外國球員好，而且仲賣得比較貴，連從未為英軍上陣嘅門將比克福特都可以賣到去3,000萬鎊（約3億港元），性格比唔算太高。