【新增內容】

ViuTV製作的節目《全民造星》首屆產生出MIRROR及ERROR兩隊組合，為香港娛樂圈帶來新氣象，MIRROR以靚仔歌舞火速吸納大批fans，代言廣告邀約不斷；而ERROR則被包裝成「騎呢男子組合」，以另類方式發展。

近日由ERROR主持的ViuTV綜藝節目《ERROR自救TV》大受歡迎，ERROR成員們開始為大家熟識之際，成員之一的193（郭嘉駿）今日突然於IG撰寫長文，向fans講解自2年多來的經歷，更表示自己「失業中」，疑似事業觸礁。

現年30歲的193因身高193cm，於參選《全民造星》已非常矚目，曾經於節目中綵排時觸傷舊患、右手甩骹仍繼續負傷演出，感動不少觀眾，時常於社交平台支持反送中運動及譴責警暴。今日193撰寫千字文，當中提到甩骹一事，他說：「其實我以前打波嘅時候受過好多次傷，韌帶撕裂過無數次，慣性甩骹係家常便飯。當時再次整傷舊患，而之前都未試過咁痛咁嚴重，所以入咗醫院，骨科醫生強烈建議我要做手術，喺無得揀之下於是自費用咗十幾萬去做微創手術。」

因傷患影響，193的舞蹈水平一直與其他成員有一大段距離，不過他亦努力嘗試：「我簽約嘅時候係未有ERROR呢樣嘢，當時一心只想做一個電視台藝員，可以拍劇同做主持，亦都講過我唔會再跳舞。ERROR成軍，當時大家知我甩過骹而且唔識跳舞，所以每次排舞嘅時候都會盡量排啲簡單嘅舞步。雖然我好抗拒跳舞，而且跳舞嘅時候膊頭會刺痛，但我都會去做，當係幫人哋完成夢想啩。如果跳舞係對團隊事業有幫助嘅，我絕對會盡力去做，最多都係斷多次手啫。」

不過努力了2年，193開始有不同的看法：「我諗深一層，幫到有幾多呢？你識我哋、鍾意我哋，係咪因為我哋跳唱呢？學保錡話齋，成三十歲人又周身傷，唔好搞咁多嘢啦。其實開多個節目畀我哋做，或者做多幾首歌，會唔會令我哋事業更上一層樓、更多人認識呢？邊樣最有效，心水清嘅ERROR fans應該即刻答到。」

之後193又說到自己入行的初衷，與現今有很大的不同：「畢業返香港之後曾經喺時裝界打滾過一段日子，曾經幻想過自己成為一個fashion model，甚至係香港嘅fashion icon。但ERROR局限咗好多嘢，人哋總會覺得我哋騎呢、岩巉、樣衰、搞笑、甚至無腦。喂！大佬我喺英國讀心理學㗎，而我自問轉數都幾快而且識講嘢，但冇人會搵我去做正經節目，因為我係ERROR。我亦都好羨慕MIRROR會有唔同嘅時裝品牌搵佢哋好型好chok咁拍廣告，收錢着住時裝品牌嘅衫出event。」

193續說：「我知道ERROR成軍嘅時候就係ERROR。呢個係既定嘅事實，所有嘢已經注定咗，而我哋四個唔係MIRROR亦都有着唔同原因，大家冇理由唔清楚。為咗團隊好，我一直go with the flow，然後自己瘋狂睇外國綜藝節目，去研究自己角色定位，研究點樣做會引到觀眾笑。因為我知道Error做綜藝係會有一番作為，會幫助到我哋四個人嘅事業。而做綜藝出色係唔夠，歌唱事業亦都可以令我哋成為一隊與別不同嘅組合，所以我keep住都有學唱歌，就算幫唔到團隊好多，最起碼都唔會成為團隊負累先。」最後193呼籲fans繼續收看《ERROR自救TV》，更似乎意有所指：「得返3集咋。之後有排都見我唔到㗎啦，我手頭上嘅工作已經完成哂。失業中的193上。」

雖然193字裏行門暗示自己「離隊」，但《蘋果》就此事向他求證時，他否認離隊之說：「唔係唔撈，只係抒發感受，肥仔（梁業）想做跳唱組合但做唔到，人哋會覺得因為我而做唔到。我都想做偶像團隊，但我哋係ERROR，純呻吓，解釋返我哋係ERROR就係ERROR。而失業中係事實，唔係離開ViuTV或ERROR，我未來幾個月日程表都冇工作，知道其他成員有嘢做，所以我係一個失業中的人。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新