李保安夫婦退休後由從事裝配門鎖的兒子阿健供養，本可安享晚年，豈料阿健接受腦科手術後變成植物人，日前更因心臟衰竭逝世，遺下兩老。夫婦二人現為無力辦理亡兒的身後事而終日憂心忡忡。蘋果日報慈善基金即時撥款，助李伯夫婦支付兒子阿健的殮葬費用。

記者到訪李家時，七十七歲的李保安一直坐在窗前發呆，並不時默然看着客廳中阿健靈位的遺照。其六十五歲妻子陳婆婆向記者歎謂：「阿健一向好孝順顧家，又心地善良，好熱心幫人。我記得有次阿健將自己由細戴到大嘅金鏈攞去當舖抵押，我問佢發生乜嘢事，佢答我：『朋友有急事，我要借錢畀佢周轉，你唔使擔心㗎。』估唔到阿健咁好仔，竟然咁唔好彩！」

一直昏迷不醒
約五年前，才三十歲的阿健，因患腦部腫瘤而需接受腦科手術。惟進行多次手術後的一個晚上，阿健心跳及脈搏突然停頓，經搶救後撿回性命，卻一直昏迷不醒。
「當初阿健變成植物人，我哋真係好難接受現實。李伯好錫阿健，有段日子晚晚都留喺醫院陪阿健，唔肯返屋企瞓。呢幾年雖然阿健病情一直冇好轉，李伯日日都去醫院幫阿健洗臉、抹身，始終希望個仔會醒番。」陳婆婆細說。