新年快「上」！踏入08年，華華同股民一樣，最關心新一年股市會點走？邊類行業最好景？華華噚日搵咗本地占星女王Jupiter玩塔羅，睇吓嚟緊邊個行業最掂；再睇埋本地富豪08年投資有冇運行，邊位大孖沙跟得過？
07年香港地產大旺，反而銀行股受美國次按風暴拖累，Jupiter就用塔羅牌，睇吓呢兩類股今年表現。
銀行股抽中「女祭司」同「太陽」。Jupiter話，前者平穩內斂，表示上半年銀行股波幅較細，升得唔多；太陽係吉牌，即係銀行股到咗下半年會前途光明，有利好消息。可惜兩隻牌睇唔到個好消息係乜，係咪美國次按危機解決到呢？

地產股危中有機

正如好多人睇好08年樓市，新一年地產股亦會出現一番新景象。Jupiter叫大家特別留意秋天，到時會有新措施或計劃出台，刺激樓價，可能係特區政府推新措施，又或者係地產商出新計劃都唔定。不過，地產股抽到嘅兩隻牌──「愚人」同「寶劍Ace」提醒散戶，有機亦有危，小心。
除咗銀行同地產，今年嘅熱門話題離唔開通脹，資源股喺通脹前提下，理應叫好。仲有，舊年澳門又多開幾家新賭場，沉寂一時嘅賭股，會唔會食住08奧運，旅遊大旺嘅商機，再創奇迹？Jupiter話兩大行業前景都會有一番新局面，令股價比較波動。賭股上半年有阻滯，升勢緩慢，下半年或者會因為行業飽和，有汰弱留強嘅新局面出現。至於資源股就會多咗企業合作嘅機會，兩個行業嘅整合，都會有利股價。
信唔信自己決定，華華都係希望畀個希望大家，投資前最緊要都係做功課，信人不如信自己嘛，吓嘩！

四大行業股