胡諾言同老婆陳琪噚晚喺迪士尼樂園為囝囝胡澔錕（Jayden）搞百日宴，請咗吳家樂、陸詩韻、梁靖琪(Toby)、吳家樂、陳庭欣、沈震軒、胡蓓蔚等過百賓客到場。Jayden花名叫波仔，同Daddy着住淺藍色西裝嘅父子裝，cute到爆，當然受盡歡迎，現場個個爭住抱，陳琪趁胡蓓蔚抱波仔時，就笑話：「抱過就會生㗎啦!。」而胡仔夫婦、波仔，再加埋大女胡芷苓（Jay）、細女胡芷悠（Jacey）一家五口影全家福時，現場啲朋友大嗌「五福臨門」，氣氛好熱鬧。

陳琪都着到靚靚現身，加上現場好多都係大台嘅藝人，十足台慶咁，不過陳琪就話自己台慶都冇着到咁靚。講到喺迪士尼搞百日宴，陳琪話老公本來唔想去咁遠，但又想喺主題樂園舉行，但胡仔就唔想做到好似只係偏心個仔咁，所以強調話3個小朋友都有份。陳琪覺得搞百日宴辛苦過結婚：「可能結婚，我冇乜嘢要顧，反而係老公做嘅多，今次由邀請朋友，到各方嘅安排都係我自己做，所以好忙。感覺似預演娶新抱咁。」

胡仔夫婦又大讚囝囝腳頭好，由出世開始，工作各樣都好順利。陳琪又講到之前發生過嘅一單趣事：「有次胡仔抱住囝囝出街，有街坊上前要求合照，但原來唔係同胡仔合照，而係想同我個仔影，搞到胡仔好尷尬。」胡仔笑話：「唔緊要，希望個仔第日名與利都比我好。o依家我好投入做湊仔公嘅角色，希望佢可以帶旺我哋。」陳琪仲話o依家傾緊一個嬰兒用品代言人廣告，希望可以促成合作。o依家有3個小朋友，佢哋都話夠皮，因為生小朋大責任大，不過陳琪就笑話今年幫仔女去逗利是應該好豐收。問到百日宴花費多少？夫婦二人話：「唔會用錢去衡量，只係開心搞一個派對，朋友仲提議收囝囝做契仔，又話幫手整教育基金，好歡迎。」

另外，同場嘅陸詩韻話依o家單身：「單身都有單身嘅幸福，識咗胡仔好耐，回想自己好似原定踏步咁，家庭當然都想擁有，但冇得強求，一切都整定，我相信緣份，o依家都好享受單身。」詩韻自爆有男仔追，但要先觀察吓，o依家嘅年紀要求穩陣，唔會心急同任性。

陸詩韻又話話過年後會幫大台拍《深宮計》，做皇妃角色。講到一班妃嬪加埋都過百歲，勆笑話：「咁咪實力強勁囉！我同胡定欣、蕭正楠有對手戲。」