11月又有唔少新劇首播，最吸引劇迷嘅當然係由女神全智賢、「長腿Oppa」李敏鎬主演嘅SBS劇集《藍色大海的傳說》，劇集於16號首播，不過同日3大電視台都有新劇首播，分別係上位男星南柱赫孖李聖經合作嘅MBC劇集《舉重妖精金福珠》同吳智昊主演嘅KBS劇集《Oh My 金雨》，所以3個劇組為谷收視就頻頻晒新相宣傳。

《藍海》今日公開嘅劇照中，足見全智賢扮演人魚嘅三種魅力，先有女神瞓喺海灘上，閉住眼，唔知係稍作休息定暈倒？只一相中就見佢拎住衫，似乎準備開門逃走，表情搞鬼，而佢望住李敏鎬時就碌大眼賣萌，相當清純可愛，又顯得天真無邪，獲唔少粉絲大讚。

而同《藍海》對撼嘅《舉重妖精金福珠》亦於今日公開新劇照，相中南柱赫孭住李聖經，但個樣就勁冧，相當Sweet，而劇集屬於青春愛情劇，應該吸引唔少年輕粉絲撐場，睇嚟到時又有一番收視混戰。