【狗仔出更】大台力捧小生開工有專人鬆骨 張振朗成個爽晒
潘志文狗仔出更張振朗機場特警
張振朗噚晚拍劇有工作人員同佢鬆骨,梗係爽晒啦。(攝影:徐錦池、羅德光、朱志聰、吳耀輝)
張振朗近年受大台力捧,一劇接一劇,好似近日佢接拍新劇《機場特警》,仲擔正做男主角㖭。
噚晚11點左右,張振朗同潘志文及區軒瑋喺將軍澳一間酒店對出開工,當佢哋set好機試好位準備正式開機拍之際,突然落大雨,攝製隊惟有叫停。最引人注目係,當工作人員set嘅位同打燈嗰陣,張振朗舉起隻手又整條頸,好似好攰咁,現場有兩位男工作員見佢咁樣,就輪流幫佢按膊頭同隻手。張振朗個樣好享受覺得好舒服咁合埋眼,又向工作人員示意自己邊度痛,工作人員又用手揉又用手踭幫佢鬆骨,睇嚟張振朗同啲工作人員關係好好咁。
期間張振朗見到記者喺度,都有主動走埋嚟打招呼同講中秋節快樂。佢話噚日拍咗好多個鐘頭劇,開咗好耐工,所以好攰。而之後張振朗同潘志文等再補一補妝準備開工拍攝。
精選娛聞,喺晒《娛果》
http://fb.com/appledailyent