韓國年度盛事《MAMA音樂頒獎禮》今年舉行為期一周嘅盛典，噚晚喺香港亞博館圓滿結束，而獲得大獎之一「最佳年度專輯獎」嘅男團EXO，噚晚完成頒獎禮後，現身得獎者面見傳媒環節，亦係惟一一隊得獎者出席該環節。

EXO已經連續5年獲得該大獎，成員燦烈更喺頒獎禮上爆喊，Kai亦有眼濕濕，現身受訪時，兩人心情似乎平復不少。而隊長Suho表示：「我哋想在此多謝我哋嘅粉絲，多得佢哋我哋先有機會拎到呢個獎，想將呢個榮耀分享埋畀佢哋，感謝粉絲對我哋嘅愛及支持。」

提到當晚嘅表演，成員Kai就表示：「我哋今晚準備咗新嘅舞台表演，亦好用心地準備，希望粉絲會鍾意，而粉絲嘅熱情亦係我哋努力嘅動力，未來我哋都會繼續努力，準備更好嘅舞台回饋粉絲。」最後Suho感謝噚晚出席嘅媒體，祝所有人有個美好嘅晚上。

完成傳媒見面環節後，EXO亦漏夜搭飛機返韓。另外，男團Wanna One及BTS（防彈少年團）都係漏夜搭飛機離港，準備出席今晚喺韓國舉行嘅《MMA》頒獎禮。

更多韓流，喺晒《娛果》
http://fb.com/appledailyent