呢個星期日就係支持普選爭民主大遊行嘅日子，各路人馬都估緊最後會有幾多人上街，中文大學做嘅調查就唔係幾樂觀，唔係好多港人好似23條當年咁㷫，非上街不可。北京同煲呔今次亦學精晒，一邊放風話個方案唔過冇所謂；又話遊行係香港人自由，總之唔想刺激香港人，鄔醫生同徐大炮更加冇晒影。但係香港冇民主，上街係一個最簡單同直接嘅表達意見方法，阿爺個阿爺冇投票權，都唔想個孫嘅孫都生活在專制之下，等？不如行啦。
八方日前問新任行會成員張炳良，佢12.4會唔會遊行？呢位原屬民主派陣營嘅學者好坦白話，佢○三年七月不在港，○四年同○五年7.1都有去遊行，不過，今次唔去咯，原因好易明，身份唔方便嘛。咁又係，唔通行會成員都上街，當年中央政策組嘅練乙錚只係去靜坐，最後都被人炒魷。
張炳良都唔知最後會有幾多人上街，但係佢就話要中央𠵱家表態支持二○一二雙普選恐怕未必講得出，一切都要視乎民主派同北京互動；至於政府會唔會讓步，相信就要睇讓咗步個方案有冇機會過喇，如果過唔到，讓都冇意思。

湯家驊英國死撐大班

張炳良擔心個方案過唔到，而民主派就擔心有民主派轉軚，到時大件事；因為早前湯家驊喺英國接受BBCHardtalk訪問，佢就力撐二十四位立會同事立場堅定。
八方早前講過，湯大狀要同煲呔比拼，專登喺歐盟飛去英國，出席煲呔上過嘅同一節目，拆穿煲呔謊話，點知個節目主持人讀熟書，有備而來，竟然挑戰湯狀，話民主派可能會有人轉軚，重點咗鄭大班個名。
湯家驊都反應快，知道一定要撐住，第一時間重申民主派二十五個議員都立場堅定，支持普選。所以話，大班千祈要生生性性，遵守承諾，如果唔係，湯狀都唔知好唔好意思再去BBC。
肥龍個政改方案幾時會剝大牙讓小步就好難知，不過佢去區議會做諮詢嘅工作今日就大功告成，去埋荃灣，十八個區都去晒，到目前為止，只有深水埗同葵青反對，算係大多數支持，過三分之二。不過，冇用呀，區議會唔係立法會。
肥龍忙於招呼區議員，連策發會管治及政治發展委員會開第一次會都去唔到，反正煲呔係節目主持人，咪等佢去搞時間表、路線圖囉。

傳真︰2623-9278
電郵︰[email protected]