韓國天團BIGBANG隊長G-DRAGON(GD)大前日被爆跟日本女星小松菜奈嘅戀情，GD嘅私人Instagram被黑客入侵，令私人密照慘被公開，對於Ig被黑，GD所屬嘅YG事務所決定採取法律行動。

大前日爆出GD跟小松菜奈嘅私人密照時，YG表示：「公司唔會干涉藝人私生活，對於GD跟小松菜奈嘅戀情無可奉告。」今日YG再有正式回應：「對於GD私生活被侵犯一事，我方將採取強硬法律行動。GD遭黑客攻擊嘅Ig帳號，係佢跟少數幾個朋友一齊分享日常生活嘅帳號，係屬於非公開嘅。而個人非公開帳號遭黑客攻擊，私密照片被公開及廣傳，明顯係屬於違法行為。」

YG又強調：「流出嘅照片中，有合成及加工嘅合照。而呢啲改圖又於網上廣泛流傳，大肆傳播虛假事實，造成第二、第三度損失。YG將維護藝人名譽，採取強硬法律行動。有關GD私人Ig被黑及網上惡意評論，公司將向調查機關申請訴訟。」