議員張文光話做領導最緊要認清歷史,嚟香港梗要惡補六四事件,最好幫襯支聯會買啲紀念品同六四歷史書做手信,包保係堅嘢,無篡改過嘅。另一個必去地方係維園硬地足球場,皆因嗰度每年都有燭光集會,又係7.1大遊行起步點,堪稱香港民主聖地,「若果日頭唔方便,夜晚偷偷哋去睇吓都好㗎。」
張文光又建議上山頂。個個自由行都去,好「行」喎!佢話上去唔係睇風景,「唔係叫佢睇乜,而係想問佢睇到乜。家吓空氣污染咁嚴重,佢哋上去睇到個真相,睇怕都要叫啲商家佬諗計,還返個藍天畀我哋。」
7.1下晝有大遊行,領導人扮忙,以前滾水淥腳上午就鬆人,遊行搞手李卓人話,胡溫與其去商場「胡混」,不如出嚟行街,「商場好易俾人暗算,加上又要封路又要落閘,認真勞民傷財,不如一齊出嚟行,我拍心口保證冇人敢埋身。溫總03年錯過咗7.1遊行,今次補番數囉。」香港人幾like胡溫,若然佢哋上街,過百萬人一齊行都唔奇。
行程搞掂,住宿好多選擇,鍾意威嘅,可以考慮瞓兩晚君臨天下;膳食方面,香港地大把好嘢食,唯一要注意嘅係,超人請食飯時要睇吓有冇油魚,佢話一向寫清楚,唔會呃人。