韓國女團4MINUTE成員泫雅嘅新歌《從哪兒到哪兒》，早前被指有抄襲組合god嘅《被反對吸引的理由》之嫌，雖然之前為《從》作曲嘅男團BTOB成員任炫植已經強調，此曲係向god致敬，不過前輩god就好似唔多接受呢個解釋。

噚日，god成員金泰宇透過所屬嘅Soulshop事務所表示：「雖然好感謝泫雅同任炫植想通過歌曲表達敬意一事，但事前無商議過，事後先得知消息覺得好遺憾，以後如果可以事先商議就好啦。因為係為咗慶祝god復出及表達敬意，我哋會接受今次年事。」

泫雅所屬嘅Cube事務所（Cube）同任炫植噚日立即喺twitter道歉，不過網民依然批評佢哋無事先通知前輩，係唔尊重嘅表現。

最終，Cube今日發佈官方聲明表示，今日韓國時間上午11時開始會立即中斷《從哪兒到哪兒》嘅網上音源服務，而之後追加推出嘅實體專輯中都唔會出現呢首歌，並再次為事件道歉。