年尾流流，特區「赤的疑惑」，繼續擴散，除咗紅火蟻奇案，愈整愈騎呢，重有國家領導人紅曾，訪問南美洲，姿態得心應手，信心十足，講嘢亦愈來愈引人入勝！
紅曾同特區傳媒記者飲茶，私下交心。幾十人坐喺處聽住，紅曾話廢董在施政報告中雖有總結經驗，但「還有不足」，即是話重未夠，形成「壽爺啱啱訓完斥，紅曾再執多劑」之局！
點知特區政府漏夜榮獲「授權」發表聲明，話紅曾唔係咁講，而係高度讚揚廢董「總結經驗查找不足」，查實係早已勝利完成，圓滿結束，事件告一段落嘞咁解！
跟住香港電台幾乎再一次遭到土共政治圍攻，俾人話歪曲紅曾講說話，同民主派裏應外合，再次亂港㖭！好在處長朱培慶今次硬淨，即時表態喝住，話當晚好多特區記者在場，明明聽住紅曾講嘢，兼近距離Check埋嘴形，故此冇可能解讀錯，咁啲老左，先至悻悻然收爹！