港股上晝疑似破頂，下晝卻被一棍打殘，大家都為突如其來跌市搵原因︰圖表派話指數成個6月都係圓頂派發，一早出現敗象，今劑穿頭破腳，肯定有排跌；消息派話今年基金搵唔到食，半年結連粉飾櫥窗都懶得做，加上市場消息欠奉，沽貨是常識吧；陰謀論派話公投反應遠超預期，阿爺擔心會失控，所以落order叫中資基金掟散港股，希望嚇窒香港人云云。

必瘦站守穩上升軌

究竟邊個解釋先合理，其實無從稽考，始終股票市場各師各法，相信每個人心目中都有一個原因。但對於陰謀論派嘅說法，唐牛想講，香港人係嚇大嘅，真理始終至上！
個市陰陽怪氣，要搵心水真係唔易，不如從基金手影出發。必瘦站（1830）近期屢獲芬佬睇中，仲要係粒粒皆星，包括鄧普頓、富達以及惠理。必瘦站乃少數上市嘅纖體美容服務供應商，最新公佈季度業績，中港套票銷售齊齊爆升五成，加上有四厘打底，相信係基金捧場嘅原因。股價走勢方面，雖然噚日受大市影響跌近3%，但依然守穩上升軌，設止蝕位於2元，現價2.14元入場，話唔定會喺下周一放榜時，有意外收穫！
哥倫比亞今屆令人刮目相看，行軍迅速打法夠機動，較比利時更有機會成為黑馬，今晚大有機會KO日本，以無敵姿態晉級。當然唐牛會繼續支持科特迪瓦擊敗希臘出線，一於買哥倫比亞主勝（2.05倍）同埋科特迪瓦主勝（1.85倍）過關，有3.8倍㗎！

唐牛
https://www.facebook.com/tongcow88