身兼青年事務委員會主席嘅Package男神劉鳴煒，今日應邀為馬會搞嘅慈善論壇做閉幕演講嘉賓；點知演講前，馬會安排一對男女高音歌手表演，Package劉睇完，即時話令佢諗住做個精彩總結嘅希望幻滅，認真謙虛噃...

Package劉其後引述論壇一個嘉賓發言，笑指成功人士有三大要素，包括喜歡易服、愛讀資料，同鍾意三項鐵人賽。佢一向熱愛三項鐵人賽，又愛睇研究資料，雖然唔係每日，但佢話偶然都會為海洋公園「易服」，講緊扮鬼扮馬啫，因為佢係海洋公園副主席嘛，如此說來，都係成功人士噃！

佢之後講返「跨界別合作」時，就話呢樣嘢講就容易、做得好就好難，認為最緊要係參加者有共同目標同心態。佢發現一般「跨界別合作」嘅成功例子，參加者一般都好後生，「通常50歲以下」，呢個GAG，令到台下唔少人笑晒口。