海通國際（665）前聯席董事總經理李耀榮（William）舊年11月尾離開，去咗一轉加拿大探女後，踏入2013年即刻有新動向，加盟東亞銀行（023）旗下東盛（經紀）集團，幫東亞老闆李國寶發大來搞。
William轉工真係轉得好着時，今年開首十日、八日，港股已經牛到不得了，每日平均成交七、八百億，坐小巴、地鐵，不時聽到身邊嘅專業散戶攞住電話噴晒口水咁同人講冧巴，好似唔入市就走寶咁。

William都係呢個星期先正式返工，佢話原先諗住轉行，唔做金融業，但好多行家知佢冇做海通都向佢埋手，咁啱東盛阿頭係佢多年老友，盛情難卻，咁又跌番落股海嘞。
東盛前身係工商東亞，98年由工商銀行（1398）同東亞銀行一齊成立，08年工商東亞因喺02至04年期間涉違規而被證監會罰款3800萬，翌年東亞就用3.72億向工行買番工商東亞75%股權，變成全資擁有，工商東亞前年改名東盛，但發展比較低調。
William喺金融界廿幾年，搵得佢加盟，應該係有心大搞，William都話，東盛遲吓會做多啲宣傳推廣，除咗證券、期貨，外滙、機構投資者都會做，家陣個市旺番晒，應該有得做！一眾股民都希望個市keep住旺啦。

李華華
mailto:[email protected]