所謂薑越老越辣，唔經唔覺做咗10年議員嘅建制派謝偉俊Paul，噚日喺立法會提出書面質詢，一次過數晒貿易戰、前高官疑犯協助軍火交易罪（係人都知講緊前局長何志平肥平啦）、香港外國記者會副主席馬凱不獲續發簽證，仲有特首林鄭月娥力推嘅明日大嶼出嚟，話上述種種問題令人擔心，會唔會對香港經濟有影響，例如觸發美國採取針對性措施，甚至令港元貶值等。呢個都算得上係一項示範動作，能夠將眾多表面上無關嘅問題，用一個主題串連埋，其他議員學嘢喇﹗

答非所問　吹捧大灣區

面對Paul嘅大包圍式問題，負責回覆嘅商經局局長邱騰華（圖）梗係用番唯一嗰招：遊花園啦﹗一嚟就大拋《基本法》同一國兩制下，香港享有獨特地位同優勢之類，然後就如數家珍講吓有乜短中長期措施，好似「密切關注」、「與業界保持溝通」，當然唔少擦吓娥特鞋，話娥特上任以來出訪超過10個國家、出席多個國際性會議，同時娥特又喺《施政報告》提出咗乜。最後嚟多個政治正確，吹捧吓一帶一路、大灣區等。

冇錯，睇嚟睇去係冇正面講肥平案同埋馬凱事件，明日大嶼方面都只係話「未有相關工程費用的正式預算」，總之當局會「顧及財政可持續性等相關因素」，「確保工程開支是政府的財政能力所能及的」。冇計啦，Paul只係做咗10年議員，同做咗幾十年嘅官仲係有些少差距。