【新增動新聞】
祖雲達斯門將保方月初再次喺歐聯決賽飲恨，不敵皇家馬德里屈居亞軍，令唔少中立球迷徒嘆欷歑。呢位39歲門將早前講過，踢埋2018年俄羅斯世界盃就會告別國際賽，到咗周一接受意大利傳媒訪問時，就透露連球會生涯亦有「99.9%」可能喺下季季後告一段落！

保方表示：「我有99.9%肯定，將會度過最後一個緊張球季，享受重大時刻，然後是時候說足夠了。」不過，呢位1995年喺帕爾馬展開職業生涯、曾8奪意甲錦標同2006世界盃嘅傳奇門將，仍然對「大耳仔盃」念念不忘，為自己鋪設「0.1%」後路：「我同球會總裁留低一個微小嘅可能性，就係如果我哋稱霸歐聯，我就會踢多一季，嘗試爭取世界冠軍球會盃同其他錦標。」無論最終結果如何，各位球迷，請珍惜保方！