文恩澄執導網絡電影尋晚喺太子搞煞科宴，參演嘅演員Dear Jane嘅Tim、張惠雅(Regen)、董敏莉等，Tim就喺戲入面做典型好男人，笑言做番自己，同Regen做情侶，不過冇親熱戲。問到佢習慣湊BB未，佢就話：「仲係習慣中，聽大家講，BB就好易湊，淨係食同瞓，又唔會扭計。」Tim就話唔使捱眼瞓湊BB：「唔瞓得好長，佢要食奶，中間都要起身一次湊吓。」佢仲讚老婆好好會爭住湊B，換片爭住做，o依家中文名未決定，Tim爸爸就諗咗三個中文名畀佢揀，但佢話自己三心兩意緊。問到會唔會搞百日宴，佢表示：「有提過，未計劃，啱啱100日係平安夜，如果搞就派對都好有意思。」

另外，董敏莉喺戲中做典型港女，佢話：「同呢班人合作提醒番自己曾經係歌手，鄧穎芝同期出道，但冇一齊合作拍過嘢，今次第一次合作，反而同文恩澄合作過，佢今次第一次執導，拍佢嘅戲，角色係港女，要男友買名牌手袋，要順自己心意，但自己冇主見嘅人，好容易受人影響，而鄧穎芝、李綺雯等係我好姊妹，自己現實就唔係港女，反而就有選擇困難，所以好羨慕嗰角色會有好多好姊妹朋友。」

除幕前工作，董敏莉話十月會同生意夥伴搞講座：「關乎同情戀同變性人topic，就請咗4位自認係同性戀者，同教授喺度分享。」問到佢會唔會再唱歌，佢就話唔會：「自己唱歌又唔係叻，不過呢排搞好多活動，見到好多年青人，仍然記得自己，仲問我唱唔唱歌。」