十年人事幾番新，滙業財經生招牌熊麗萍（Conita）快將離巢，由做分析、證券部主管，到做董事足足10年，「做咗咁耐唔捨得㗎，咁多年得到老細提拔，有啲同事合作咗七、八年㖭。」不過佢話想轉換吓環境，咁啱有人問有冇興趣，就想試吓囉。

喺滙業做到今個月底嘅Conita，話新工細節暫時唔方便透露，只係仍然做番老本行，「市場家不斷變，希望多啲時間學吓嘢，例如集中喺投資嘅工作。」唔計公幹，已經兩年冇放過假嘅Conita，話會趁住轉職空檔放吓長假。
噚日呢個消息喺缸湖傳開，Conita個電話就響過不停，有股民專登打上公司問消息真偽，最想知當然係仲會唔會上電視啦。「我7月仲喺香港，除咗放假之外，都可以喺公仔箱見到我。」相信佢班粉絲可以放心啦。