過去兩年出現很多各式不同的電影培訓計劃、課程，連同各間大學的傳理系畢業生，加上演藝學院電視及電影製作系，再加上海外修讀電影的留學生。其實我覺得所謂電影圈缺乏新血的問題根本不存在。
二零零二年某一日，董伯伯唔知點解突然覺得要大力推動創意工業，一班高官感覺到係時候要做嘢。跟住就成立咗個有一億嘅電影業發展基金去扶助整個行業。一億有幾多我幻想唔到，但係董伯伯同眾高官呢份誠意就真係想都想唔到，再一次證實佢哋係好人。政策成立嘅目的當然係好，不過執行上係另一回事，成果亦都要日後才知道。短短幾年間我睇到有好多轉變，政府確實係做咗啲嘢，但事實係電影生產數量仍然每年持續下降，問題錯綜複雜，相信唔係一個政策可以解決。

不過近日受惠於推動創意工業下的各大培訓計劃學員陸續畢業，就真係有啲難搞。首先行業內根本冇咁多戲開拍，就算班學員唔收人工嚟做都冇嘢畀佢哋做。如果有戲開，行業內亦都有大量待業熟手技工等緊，咁唔通呢班人就唔使理？個問題唔係唔夠人用，係人太多，工作太少，到底有冇人知道？係咁搞啲唔同名目嘅課程都唔係辦法。不過我相信有才能、有創意嘅人一定會有佢哋自己嘅方法去闖出一條路。
我最怕發生嘅事就係有人混水摸魚，當班學生唔使錢，又有啲學生肯去做，跟住發生爭拗就真係無謂。