楊千嬅將會喺今年12月23至26日舉行「楊千嬅三二一Go !演唱會2017」 紅館演唱會，千嬅今次請咗林海峰(Jan)設計演唱會海報，Jan讚千嬅係利害人妻，由少女變烈女再做Women繼續做到老。演唱會聽日開始至29號，正式接受優先訂票，千嬅早排為演唱會拍宣傳海報，佢同Jan雖然合作過拍電影，不過音樂方面只係第一次合作，千嬅笑話：「今次請得阿Jan合作，因為唔係咁多人知我想點，我哋大家一講就明，二講就亂！」阿Jan就話：「今次係對大家一個挑戰，因為千嬅演唱會嘅班底都係新合作。」今次演唱會三面台設計，千嬅預告會唱好，音樂會友，而且畫面視覺上有新突破。

Jan覺得千嬅呢位利害人妻，由少女變成烈女再可以做到老，好似有路軌一路行落去，千嬅話：「呢個係命嚟嘅！性格令條命增加唔少色彩，咁老咗做姥姥，就算老咗做一個有法術嘅姥姥都係叻嘅！」Jan又大讚千嬅對自己嘅路向十分清晰，千嬅話：「最緊要做事有層次，價值有冇遞增同有進步，而且身邊有一班同事幫我敲條路出來一齊行。」

阿Jan又為咗海報設計搵靈感，聽過千嬅主打新歌《Wonder Women》，佢聽完呢首歌有所啟發，所以造型上有啲女中英雄嘅感覺，千嬅自認鐘意睇英雄片：「我覺得其實人人都可以做英雄，只要將自己嘅優點同才能發揮出嚟，而且我好鍾意電影《Wonder Women》(神奇女俠》女主角嘅態度同堅持，有啟發性嘅力量。」

Jan問千嬅點解新歌有Wonder Women呢個概念？千嬅答佢o依家嘅女性好利害，有啲女仔有唔同態度同思考。 Jan再問千嬅另一半鍾唔鍾意佢咁利害？千嬅笑話做人妻要畀老公足夠安全感，唔使老公為佢擔心。