踏入12月流感高峯期,連本地豬隻都染咗人類豬流感,都咪話唔驚。香港人固然緊張,原來日本人仲更加識得明哲保身,為咗避開流感高危地方,當地民間組織日本氣象協會,最近推出咗一個便攜式流感指標計,可以測度所處環境係咪潛在高危患流感地方,提醒佩戴者需唔需要走佬。本港專售日本產品嘅連鎖專門店JCShop即刻引入嚟香港。
負責人Alan話,部機好輕巧,重量只有25克,附頸繩可以掛上身,㩒一下末端嘅按掣,就可以測度佩戴者所處身環境嘅溫度同濕度,從而計算出潛在流感病毒風險。日本氣象協會話,溫度越低細菌病毒越活躍,加上空氣越乾燥,病毒等懸浮喺空間越多越易中招。