方力申今日喺書展出席「傑出青年的故事分享會」，佢指呢本書「十傑」係上年十位傑青人士O既故事，透過呢本書，對其他傑青更加了解及認識，佢話：「除咗係互相紀念之外，亦希望帶出正面訊息，人生唔需要畢生受用嘅金句，有時將唔同想法、或者經歷同年輕人分享下。」呢本書仲用作慈善用途，小方自購300本。

講到書內容，小方表示有啲從未透露過嘅事情，例如大談自己負面嘅事，佢話：「公司同事或者屋企人見到就會話，咁負面嘅事，講自己唔好嘅事，邊有人咁寫出嚟，但我覺得如果想同年輕人講，冇人淨係鍾意聽你好嘅一面。」

「喺書入面，我有講到自己喺游水上，由頭到尾我都唔係好勤力，都係有反叛期，我以為自己唔係好驕傲，但我都曾經有自大一面，特登偷步跳落水，偷步好威，因為人人都唔敢，跳咗落去郁下先，浸下水先，上番嚟跳落去又贏喎；試過有次錦標賽，要幫泳會攞分，我連續兩次偷步，好瘀，全部人望住，人哋攞咗自己個位，又幫唔到泳會攞分，自此之後我就改番呢個壞習慣。」

會唔會出一本淨係屬於自己嘅一本書﹖小方話：「未有呀，經常做人物專訪，咁多訪問，其實好多嘢都講晒。」