愛國片《戰狼2》今晚喺尖沙嘴海運戲院舉行首映，女主角盧靖姍接受訪問時話好戥吳京開心，有咁好嘅成績，佢話自己本身拍完《狼牙》（係2008年嘅作品，都係吳京嘅，仲自導自演㖭）之後去咗美國發展，盧靖姍話：「媽咪同我講，唔好唔記得自己係一半嘅中國人（意思係指佢係混血兒，中美混血），因為自己喺中國咩人都唔識，淨係識吳京，所以兩年前吳京搵我做女主角，媽咪聽到好開心，因為媽咪當年已經患重病，佢話一定要部睇戲同探班，好開心，仲話因為咁，媽咪話係對抗病魔嘅強心針，不過媽咪已經過身。」

問到盧靖姍會唔會再拍？佢話：「睇到吳京今次拍得好辛苦，攞條命嚟博，拍啲荷李活未拍過嘅一鏡潛水打戲，仲有坦克飄移等等，都唔係咁容易。今次團隊非常厲害，自己今次未拍《戰狼2》前，已經接咗另一部戲，係非常另類電影。（咁係咪冇加片酬？）自己覺得電影係唔會用錢片去衡量，最緊要係好嘅電影，寧願同經理人講喺廣告或其他方面賺多啲錢。」