當年今日
關於我們

【C1頭條】懷孕胎死腹中 發嫂哽咽:今時今日我有諗個女

蘋果日報 2017/10/31 00:00

周潤發C1頭條陳薈蓮我老公係發哥

民間特首周潤發,雖然巨星,但銀幕下平易近人,太太陳薈蓮秉承其親民態度,同樣深得民心。最近發嫂接受《蘋果》專訪,《蘋果》即時娛樂及「娛果」由昨日開始,一連三周,逢周一至周五,將推出15集獨家連載專訪。
頭炮發嫂首談此生最遺憾的喪女之痛,91年懷孕9個多月的發嫂,在臨盆前一星期,女兒因臍帶纏頸胎死腹中。最後發嫂選擇了自然分娩,產後護士迅速抱走孩子,因為發哥不想妻子見到而再受打擊,但發嫂最後自己也看了。發嫂相隔16年訴說這段往事,仍哽咽道:「因為個BB嗰晚喺肚入面冇乜動靜……突然間我問我老公,『做乜個女今日咁乖,唔踢我個肚呢?』當時距離預產期只有一星期。」
發嫂覺得不對勁,翌日起來就去看醫生,她憶述:「第二日落好大雨,老公陪住我去旺角睇醫生,當時我地澗住水,雨水嚟到膝頭哥,入到診所,做了初步檢查,醫生沒跟我說甚麼,只是說,『要入院。』我睇到醫生表情,好似有少少唔妥,但我唔知乜嘢事。我覺得有少少問題,但我冇諗到咁壞。於是我老公就帶我去醫院。」
堅持經歷順產
憂心忡忡的發嫂,由發哥陪同去醫院,車程雖很短,但她如墮五里霧中,心裏一直祈禱不想囡囡出事:「去到法國醫院,scan晒所有嘢。嗰啲姑娘同埋醫生,個表情都俾我知道,有一啲嘢唔係幾好,係好大件事㗎喇。」發嫂抹了抹鼻、看了一下天,她續說:「佢(醫生)就叫我老公入嚟:『不如你自己同你老婆講。』」
發嫂頓了頓繼續說:「老公同我講,『醫生話,不如開刀啦。』」因為胎死腹中,醫生建議剖腹取出死胎,但發嫂拒絕了,她回憶當時說:「我講,我唔要(開刀)。醫生姑娘全部好sad,唔肯講俾我聽。因為唔想我經歷呢件事,因為BB死咗入面。但我話,『無論如何,我點都要經過呢個過程,我都陀咗咁耐啦。』」最後在發嫂堅持下自然分娩,女兒是因臍帶纏頸而胎死腹中,產後護士迅速抱走孩子,因為發哥不想妻子見到再受打擊,但最後發嫂堅持要見女兒第一面也是最後一面。
化大愛助弱勢
發嫂用力地透大氣,望向另一邊,避開鏡頭,再次憶述一生最痛,但已忍不住流下淚來:「佢(發哥)就……晚晚陪住我囉……但係我好……嗰刻呢,我唔知做乜嘢,我冇喊,我冇喊。」她聲線微顫道:「我喺腦中只有一句嘢說話,『做咩係我?』做乜呢單嘢要發生喺我身上?我要等到7年,甚至乎等到7年之後,我至明白個道理。」發嫂是經過整整7年才逐漸走出傷痛。至今兩人膝下無兒女,其實不難理解,但夫妻倆將這份喪女之痛化成大受,努力回饋社會,更經常私底下去捐錢或出力幫助弱勢社群。

採訪:陳月媚、倩宜
協力:林德雄
髮型:Byron Ho、Louis
化妝:Fiona To
場地提供:香港嘉里酒店