寧得罪拉登，莫得罪高登。前排有眼利又細心嘅高登網民發現，每日晚間新聞前必播嘅《心繫家國》宣傳片嘅「汗水篇」中，描述太空船升空一幕裏面，有一個唔夠2秒嘅鏡頭中，出現疑似係1969年美國太空船阿波羅11號升空嘅影片，隨即被高登仔恥笑為宣揚美帝訊息。於是八方本住求真嘅精神向民政事務局查詢，原來高登仔突破盲點！

民政事務局發言人向八方證實，2009年製作呢條本名應該叫「輝煌里程」嘅宣傳片時，為咗「營造太空船升空及控制室的視覺效果」，專登製作出太空船升空嗰一幕嘅「虛擬場景」。
發言人又強調製作公司係從「公眾領域」中，取得阿波羅11號嘅升空片段，仲實牙實齒話唔涉及侵權。不過發言人又話，鑑於公眾有疑問，加上為咗確保「可達到應有的效果」，當局會跟進喎。
深諳《版權法》嘅議員湯家驊就話，係咪「公眾領域」需由法庭決定，視乎版權持有人堅唔堅持行使版權，即係堅持的話就係侵權囉。人民力量慢必陳志全則覺得，既然心繫家國係唱好中國嘅政治宣傳片，用番美國嘢就有誤導之嫌囉。