做善事有錢出錢，有力出力，講就容易，做落就一啲都唔簡單，如果做到出錢出力，就更加唔講得笑。因為派免費粥敬老而街知巷聞嘅何文田愛民邨粥檔老闆李松慶，噚日喺粥檔貼出「休息數天」告示。八方去到探佢，亦見佢個樣謝晒，垂頭喪氣，唔似得早排咁好笑容。李老闆解釋：「自己同班拍檔做到殘晒，大家都好想休息吓。」

老闆冇講幾時復業開番檔，淨係話想休息幾日。噚日嚟食免費粥嘅婆婆，就一邊食魚片粥同炒麵，一邊同其他長者商量，未來幾日冇免費粥食，大家有乜打算。有個阿婆靜靜雞同八方講，其實老闆唔使煲啲咁靚嘅粥畀佢哋食，話「我哋班婆仔都話，每朝唔使錢食碗白粥仔，大家已經好開心。」
有粥食粥嘅街坊講，自從李松慶派免費粥敬老嘅報道出街後，越來越多人嚟幫襯，見到老闆同班夥計真係做到冇停手。呢位街坊建議，其實老闆應該搵幾個義工嚟幫吓手，招呼班老人家，減輕原來班夥計嘅工作量，或者唔一定要派免費粥，半價優惠老人家，相信班老人家亦開心。