無飯主婦老公錫到燶
周嘉玲寶貝計劃顧慮多
91年香港小姐亞軍周嘉玲,去年7月與拍拖僅九個月的印度籍室內設計師DarrylGoveas閃電結婚,新婚甜蜜蜜的她盛讚夫婿服侍周到,更自嘲是無飯主婦,但夫婿毫無怨言。談到造人大計,顧慮多多的她表示一定要有周詳計劃,做個負責任的媽媽。 撰文:顏英儀
周嘉玲與印度籍丈夫DarrylGoveas去年7月在泰國註冊結婚擺喜酒,結束單身生活,兩口子現居於港島半山,訪問當日穿上StellaMcCartney新裝的周嘉玲在家中一臉幸福地說:「我同老公喺香港邂逅,兩個人好夾,好開心可以搵到個partner一齊生活,多個伴同我分享、經歷,大家互相學習。我好欣賞佢好重視家庭,婚後我獲得更大自由。」
周嘉玲續說:「Darryl係個好細心嘅男人,佢知我鍾意食蘋果批就會特登買畀我食,一個蘋果批值幾錢?我在乎嘅係心意。爹哋最初擔心我搵唔到個好似佢咁細心嘅男人,Darryl對我好體貼,爹哋都好放心,而且老公仲識煮飯,相反我對煮食一竅不通,名副其實係個無飯主婦,可能自細俾屋企人寵壞。」
兩個不同國籍和文化背景的人走在一起,問周嘉玲怎樣克服文化上的差異,她說:「基本上我哋兩個人相當夾,佢喺歐洲長大,我又比較西化,生活上完全冇問題。兩年來我哋一齊去旅行,去過墨西哥、阿根廷、印度、巴西、比利時、越南同智利,令我眼界大開,下一站我哋計劃去斯里蘭卡。」
熱愛工作的周嘉玲婚後堅持繼續做女強人,由六年前開始轉行做公關,到今天已掌管本地名店PedderGroup市場部,管理公司東南亞的業務,她說:「工作方面我從來冇定目標、冇計劃,不過會盡力做好工作,我覺得自己好幸運,公司畀好多機會我發揮。我認為30歲至40歲係人生最重要嘅階段,加上我比較勤力,又鍾意fashion,懂事以來眼光都比較長遠,睇嘢要360°,我好鍾意工作,不過我只係賺錢買花戴,我覺得自己係個好幸福嘅女人。」
談到造人大計,周嘉玲有自己的獨特看法,她說:「近年香港空氣好污染,我喺加拿大溫哥華出世,空氣同環境非常好,而香港可以畀小朋友去嘅公園又少,除非好有錢擁有countryclub會籍,養大一個小朋友要400萬一啲都唔奇,所以一定要好好準備。我一定會生BB,但係冇特別plan幾時,不過我一定會做個負責任嘅媽咪。香港人養狗同湊BB都係交畀工人照顧,我每朝去寶雲道都見到班菲傭帶狗仔散步,好似啲狗係佢哋養嘅咁。我覺得BB同狗冇分別,我唔想做個咁嘅媽媽,至少有90%時間照顧BB先會生,好彩屋企人冇催我哋。有小朋友嘅家庭先會完整,生仔就要順其自然,要發生就會發生。」
選港姐是周嘉玲人生最難忘的一件事,她說:「我人生有幾件難忘事,選港姐係其中之一,對我有好大影響,令我可以喺娛樂圈發展。當年我仲讀緊書,覺得悶咪去參加選美,近年我冇留意港姐,好似冇咗以前港姐嘅glamour,成件事同以前冇得比,當年我喺瑞士拍外景都算幸運。」
談到電影,周嘉玲90年代拍過多部電影和電視劇,當年20來歲的她曾拍過近20套電影,不過她一點也不留戀在電影圈的日子,她說:「嘩!我覺得電影已經係太耐以前嘅事,不值一提,好似《重慶森林》呢部戲已經係好耐之前嘅事,我已經完全抽離娛樂圈。我𠵱家只會買飛入場睇戲,《黑社會》係我最近睇過嘅港產片,至於王家衞近年作品,好似《2046》同《花樣年華》,我都冇睇,佢好藝術家,佢拍嘅戲好似太抽象,冇咗故事性,似一幅畫,油極都未完,太過抽象。」
攝影:陳慧安
去年7月周嘉玲與印度籍夫婿DarrylGoveas在泰國結婚,她更穿上傳統服飾出嫁。
周嘉玲在港島半山的兩口之家接受訪問,大談家庭與事業。
周嘉玲在《重慶森林》中與梁朝偉有大膽演出。 電視圖片